komnap wat po thi chum វត្តពោធិជុំជំរំព្រះធម៌ តែងដោយ ភិក្ខុ.ឥន្រ្ទីយសំវរោ ប្រធានសង្ឃ វត្តសិរីឧត្តមពោធិជុំ ថ្ងៃច័ន្ទ៥កើត ខែស្រាពណ៍ឆ្នាំវកអដ្ឋស័កព.ស២៥៦០ (08/8/2016)
ជយោ!ព្រះពុទ្ធសាសនាគណ:មហានិកាយរុងរឿងពាន់ឆ្នាំ
ជយោ!វត្តសិរីឧត្តមឋិតឋេរចិរកាល
វត្តពោធិជុំជំរំព្រះធម៌
ក្នុងនាមខ្ញុំជាប្រធានសង្ឃថ្មី សូមថ្លែងសេចក្តីប្រាប់ដល់មិត្តញាតិ
ក្នុងឱកាសនេះខ្ញុំសូមរាប់រៀប ឱ្យលោកអ្នកជ្រាបពីវត្តខ្ញុំខ្លះ ។
កំណើតកសាងឆ្នាំសាមប្រាំបី(១៩៣៨) លោកអ្នកប្រុសស្រីប្រហែលដឹងច្បាស់
វត្តពោធិជុំមានពីយូរណាស់ មិនដែលប្តូរផ្លាស់នាមម្តងណាឡើយ ។
មើលពីចម្ងាយស្រស់ល្អផូរផង់ ខ្លោងទ្វារសាងសង់ថ្មីរួចស្រេចហើយ
ក្បូរក្បាច់រចនាល្អណាស់អ្នកអើយ ដូចអង្គរហើយជាស្នាដៃខ្មែរ ។
របងមានក្បាច់ស្រស់ស្អាតអស្ចារ្យ ព័ទ្ធពីរហិចតាជាប់ជាហូរហែ
ជុំវិញដីវត្តទុករក្សាថែ កេរពីដំណែលតាយាយញោមវត្ត ។
រូបគាត់ទាំងពីរឈ្មោះហួនដូចគ្នា អ្នកមានសទ្ធាថ្វាយដីប្រាកដ
ឧទ្ទិសដល់សង្ឃសម្រាប់សាងវត្ត យើងដឹងគុណគាត់មិនដែលភ្លេចឡើយ
ចូលកាន់តែជិតមើលរឹតតែសម មានទេពប្រណម្យតម្រង់ជួរហើយ
រំលេចពណ៌ស្រស់សម្រស់ត្រាណត្រើយ មិនចាញ់សោះឡើយនឹងស្រីសួគ៌ឋាន ។
លុះចូលដល់ពិតគន់រិតតែល្អ ឈើស្លាលម្អជាជួរសង្ខាង
អមផ្លូវចូលវត្តទុកជាតំណាង ស្វាគមន៍អ្នកសាងអំពើសុចរិត ។
ចូលដល់ផ្ទៃវត្តជក់ចិត្តអស្ចារ្យ ទីធ្លាសួនច្បារភ្ញីផ្កាជុំជិត
បានសង្ឃថែទាំយ៉ាងល្អប្រណីត ក្នុងចិត្តជាក់គិតពិតថាស្អាតហួស ។
សម្រស់សួនច្បារវត្តពោធិជុំ ស្រស់ស្អាតមនោរម្យជំរំអ្នកបួស
មានម្លប់ពោធិ៍រាំងពិតត្រជាក់ហួស ធ្វើឱ្យអ្នកបួសបានស្ងប់ចិន្តា ។
ខាងជើងមើលត្រង់គឺព្រះចេតិយ ព្រះពុទ្ធអភ័យតំណាងមេត្តា
តែងតែអត់ទោសដល់សត្វមនុស្សា ដោយក្តីករុណាមេត្តាទាំងអស់ ។
ព្រះធម្មចេតិយតម្លៃជាងពេជ្រ ព្រោះបានរំលេចពាក្យពេចន៍របស់
ព្រះពុទ្ធជាម្ចាស់គ្រប់អង្គទាំងអស់ ដោយក្តីអនុគ្រោះសត្វក្នុងលោកា ។
ព្រះពុទ្ធនិព្វានពិតគួរសង្វេគ ស្ទើរស្រក់ទឹកភ្នែកលើផែនថ្មដា
ខាងត្បូងវិហារអមដោយសួនច្បារ សម្បូរបុប្ផាក្លិនក្រអូបសាយ ។
នៅតាមមាត់ស្រះឈូកមានផែទឹក គយគន់មើលភ្លឹកពិតពុំជិនណាយ
ព័ទ្ធជុំវិញវត្តស្រះវែងអន្លាយ ផ្ការីកសុះសាយព្រងព្រៀតទាំងអស់ ។
ទំនៀមម៉ោងប្រាំរសៀលស្តាប់ធម៌ អប់រំចិត្តល្អកាយមិនឡេះឡោះ
វាចាសុភាពពោលពាក្យពិរោះ ពិតសមនឹងឈ្មោះសក្យៈបុត្រហើយ ។
សព្វថ្ងៃក្នុងវត្តរួមមានព្រះសង្ឃ មួយម្ភៃពីរអង្គមិនមែនតិចឡើយ
សិក្សារៀនសូត្រពិតមិនកន្តើយ ព្រោះមិនខ្វល់ឡើយរឿងក្រៅតម្រា ។
ផ្លូវលោកផ្លូវធម៌ដើរទន្ទឹមគ្នា សង្ឃគ្រប់អង្គាតែងនឹកប្រាថ្នា
រៀនយកផ្លូវលោកដោយចិត្តឧស្សាហ៍ ផ្លូវធម៌ថ្លៃថ្លាខំប្រតិបត្តិ ។
លោកគ្រូបង្រៀនជាធម្មាចារ្យ ឆ្លៀវឆ្លាស់អស្ចារ្យក្នុងការបង្ហាត់
ខំព្រួតដៃគ្នាដើម្បីបំបាត់ សាមគ្គីកំចាត់គ្រោះអវិជ្ជា ។
ភាសាបាលីប្រពៃខ្មែរវៀត អង់គ្លេសថែមទៀតក៏ពុំរុញរា
សង្វាតរៀនសូត្រគ្រប់ពេលវេលា ប្រាថ្នាវិជ្ជាមកដាក់ក្នុងប្រាណ ។
វត្តពោធិជុំសម្បូណ៍អស្ចារ្យ ក្បួរក្បាច់រចនាខ្មែរពីបូរាណ
គ្រុឌនាគកិន្នរ បវរក៏បាន ចាប់បង្ហាញប្រាណទុកជាលម្អ។
ក្បាច់ខ្មែរអង្គរទេសហៀនភ្ញីភ្លើង បានរំលេចឡើងទាំងក្បាច់ភ្ញីវល្លិ៍
ខ្ញុំពិតស្រឡាញ់ដោយក្តីស្មោះស នឹងថែឱ្យល្អពង្រីកតទៀត។
វត្តពោធិជុំជំរំព្រះធម៌ ព្រះសង្ឃបវរល្អក្រិត្យរបៀប
ទ្រទ្រង់វិន័យព្រះត្រ័យលោកនាថ ពុទ្ធរិស័ទទៀតមារយាទថ្លៃថ្នូរ។
ណ្ហើយចុះប៉ុណ្ណេះសូមស្លេះប៉ុណ្ណឹង អំពីដំណឹងនឹងការផ្លាស់ប្តូរ
វត្តពោធិជុំនឹងល្បីរន្ទឺ ដោយការតស៊ូនៃយើងនេះហើយ។
បន្ទាប់សូមផ្តាំដល់អស់ខេមរា ខំជួយរក្សាកុំធ្វើព្រងើយ
ដួងព្រលឹងជាតិគឺវត្តនេះហើយ បងប្អូនខ្មែរអើយកន្តើយដល់ណា ។
តែងដោយ ភិក្ខុ.ឥន្រ្ទីយសំវរោ ប្រធានសង្ឃ វត្តសិរីឧត្តមពោធិជុំ
ថ្ងៃច័ន្ទ៥កើត ខែស្រាពណ៍ឆ្នាំវកអដ្ឋស័កព.ស២៥៦០ (08/8/2016)